Í klæðaskápnum
Til hægri
hlý vetrarblá peysa úr rakri lambsull
fagurlega ísaumuð rauðum tungum
sem teygja sig upp að brjósti
hvítt sjalið fljótandi ísjaki á opnu hafi
ilmur fjallagrasa
mynd af mánanum
himnesk snerting
moldarbragð
flokkur hlæjandi hettumáva á flugi
í flæðarmálinu umlykjandi faðmur voldugrar brimöldu
Ég
Til vinstri
sítt pils úr sumarbláu silki
þunnt eins og slæðan milli lífs og dauða
gult beltið rák af blómstrandi sóleyjum
dregin milli svarthvítra kúa á beit
í bylgjum landslagsins
órofa þytur vinds sem verkjar í eyrum
heill skógur af krákum
einnig þær hlæjandi
en á framandi og óskiljanlegan hátt
Í klæðaskápnum
hægri vinstri
hægri vinstri
og mitt í
allri ringulreiðinni
Ég
stend nakin milli hægri og vinstri
hrörnandi þöll ein á berangri
hvorki börkur né barr
peysa né pils sem hlúir að
Hvernig skal sá lifa lengi sem aðeins fær birt
helming af því ljósi
sem hann ber innra?
* Draumey Aradóttir, TMM 2, 2006
Fimm vörður
Hlátur þinn elti fótmál mitt
og saman ruddum við veg upp hálsinn
þar til tindi var náð
síðustu sólargeislarnir
breiddu gylltar nátthúfur á ískollana tvo
struku blíðlega fætur okkar
og vörðurnar fimm
Fimm dagar
Fimm nætur
Ég stend á barminum
og spyrni við einstiginu sem leiðir mig skref
fyrir skref niður í skuggsárt gljúfrið
þar sem fossinn innsiglar söknuðinn
en þegar birtir bergmálar hláturinn
í hlustum mér á ný:
lífið er til að lifa því
* Draumey Aradóttir, Fimm vörður á vegi ástarinnar, 2003
Sjóferð
Langa ljóðlausa daga
leikur andardráttur þinn sætast
í hári mér
varir þínar teikna mér náttkjól úr salti
lófarnir festa reikistjörnur
á grænbláar hvelfinga
sverðfiskur
Langar ljóðlausar nætur
ferðumst við saman
í stórstreyminu
tvær rísandi öldur
í úfnum sjó
* Draumey Aradóttir, Bláa handklæðið, 2002
Fjallganga
Einu sinni hélt ég
að lífsgangan fælist í að sigra tindinn
á eigin fjalli
ein og hjálparlaust
en þegar ég hitti þig við fjallsræturnar
skildi ég að gangan sjálf er sigurinn
og að ævintýrið er að fara hana
tvö saman
* Draumey Aradóttir, Fimm vörður á vegi ástarinnar, 2003
Fugl hamingjunnar
Þú braust þinn fugl
ég minn
Þinn synti eftir beinni línu
að sjóndeildarhring borðsendans
minn flaug hamslaus ótal hringi
útum gluggann
upp til mánans þar sem kanína
gerði sér næturstað í gleði hans
Trana er fugl hamingjunnar
segja meistarar pappírsbrotsins
Hamingjan fer sínar eigin leiðir
Draumey Aradóttir, Bláa handklæðið, 2002
Leikur
Komdu með mér út í skóginn
leiktu með mér að mér við mig
bara ekki á mig
Svo lengi lærir sem lifir er sagt
en ég vil það ekki
vil ekki vita
þekkja
kunna
geta
heldur leika:
leika oft mikið og af öllu hjarta
svo lengi sem ég lifi
og þú
Komdu með mér út í skóginn
feldu mig finndu mig
alla
alltaf
segðu bara ekki
að það sé lærdómur að leika
* Draumey Aradóttir, Fimm vörður á vegi ástarinnar, 2003
Fangi
Ég er fangi í neti ástarinnar
um ökklana grænar glerkúlur
sem hringlar í þegar spurt er að leikslokum
bjartir dagar og svartir lita klæði mín röndum
á enni mér er brennd kennitala
þess sem ég elska
Ég er fangi í fallhlíf ástarinnar
í senn þyngri og léttari
en nokkur annar draumur á jörðu
* Draumey Aradóttir, Fimm vörður á vegi ástarinnar, 2003
Hrekkur
Er iðja þín Amor
þá aðeins leikur að örvum
þar sem mestu skiptir
að hitta fólk í hjartastað
og fá sem flest stig?
Hvert sæki ég aukalíf?
* Draumey Aradóttir, Fimm vörður á vegi ástarinnar, 2003
Baðkar
Orð þín fylltu baðkar
stór
djúp
og heit
við böðuðum okkur bæði í þeim
Daginn sem yfir flaut
var of seint að kenna þér
á kranann
rödd mín drukknuð
í orðflaumnum
* Draumey Aradóttir, Fimm vörður á vegi ástarinnar, 2003
Tækifæri
Ég vissi ekki
að jörðin væri lærdómur og himinninn lífið
að við værum stjörnur á stöðugu reiki
milli þrenginga vetrar og víðáttu vors
ekki fyrr en höfuð mitt gægðist
upp úr dómhörðum jarðvegi leitarinnar að sjálfri mér
og sá að gult var alls ekki gult
heldur aðeins eitt gulu blæbrigðanna
ekki fyrr en ég gróf mér göng
upp úr dýrkeyptum jarðvegi leitarinnar að lífinu
og sá að ég hafði bæði uppgötvað
og glatað tækifærinu
Og þó ekki...
við erum stjörnur á stöðugu reiki
* Draumey Aradóttir, Fimm vörður á vegi ástarinnar, 2003
Töf
Allir menn eiga sínar sögur
að sættast við og sameina
– sínar frásagnir að hlýða á.
Enginn kemst hjá því að mæta sjálfum sér
í spurn.
Ég mæti mér.
En það líður á löngu
áður en ég áræði að spyrja
opna grænt garðshlið bernskunnar
og smeygja mér út
leggja í för um ókunn lönd
með drauma mína að áttavita
óttann sem fylgisvein. .
Ég þykist sjá móta fyrir vegi mínum
en ég fer hann ekki
fætur mínir hlekkjaðir
við djúpstæða minningastólpa
flækjast stöðugt hvor fyrir öðrum
hjartalaga lófar þaktir blæðandi sárum
gaddavírsins.
Nóttum saman sit ég á eintali
við flöktandi skugga
sem skýst inn í rökkrið hvert sinn
sem ég reyni að faðma hann.
Lágvær kveðandi vetrarvindsins
klæðir drauma mina svefnhöfgi
einn af öðrum.
Fylgisveinninn hnippir í öxl mína.
Í gleri áttavitans gömul sprunga
sem tefur för.
Allir menn eiga sínar sögur
að sættast við og sameina
– sína áttavita að horfa á.
* Draumey Aradóttir, GARDAR XXXVII (Samfundet Sverige-Island), 2006
Afrek
Við erum ekki á eitt sátt um neitt
nema ást okkar
hvors til annars
Afreksfólk setur heimsmet
í spjótkasti
kringluvarpi
skítkasti
við horfum hljóðlát
hvort úr sínum stól
hvort í sínum heimi
milli okkar ástin
afrek út af fyrir sig
* Draumey Aradóttir, Fimm vörður á vegi ástarinnar, 2003
Fylgd
Það breytir engu
þótt við föllum ekki að sömu strönd
þótt útsker byrgi okkur sýn um stund
bara ef þú vilt vera næsta alda á eftir mér
og fylgja mér yfir hafið
* Draumey Aradóttir, Fimm vörður á vegi ástarinnar, 2003
Eitt orð - fimm bókstafir
Eitt orð
getur verið samansett úr fimm holum bókstöfum
fimm víðopnum dyrum
og samt reynt svo djúpt og myrkt
að ómögulegt er að þrengja sér gegnum það
Eitt orð
getur búið yfir mætti til að útmá persónuleika
rétt eins og misheppnað pennastrik
eða lélegan brandara
Ég hef mætt manneskju
með ljóslausa lukt
séð móðu lífsins leysast upp í spegli
heyrt draga úr hrynjandi gleðinnar
hægt svo
hægt
Víðopnar dyr
fimm þögul skynfæri
fimm lyklar án tilgangs
Tunga
Fimm holir bókstafir
og slokknandi lukt
* Draumey Aradóttir, GARDAR XXXVI (Samfundet Sverige-Island), 2005
UPP
